शासकीय अधिकारी/कर्मचारी यांना राष्ट्रीयकृत बँकांच्या SGSP या वेतन खात्याशी संलग्न अपघात विमा योजनेबाबत अवगत करणे State Government Salary Package account
शासकीय/निमशासकीय अधिकारी / कर्मचारी यांना राष्ट्रीयकृत बँकांच्या “State Government Salary Package” (SGSP) या वेतन खात्याशी संलग्न अपघात विमा योजनेबाबत अवगत करणे
महोदय/महोदया,
शासकीय/निमशासकीय अधिकारी / कर्मचारी यांच्या वेतन बैंक खात्याशी संलग्न अशा अपघात विमा विषयक लाभ आधारीत योजना विविध बँकाकडून राबविण्यात येत आहेत. काही बँकांकडून वित्त विभागाकडे शासकीय अधिकारी / कर्मचारी यांची वैयक्तिक वेतन खाती उघडण्यास मान्यता देण्यासंदर्भातील प्रस्ताव प्राप्त झालेले आहेत.
शासकीय अधिकारी/कर्मचारी यांचे वेतन खाते कोणत्या बँकेत असावे याबाबत शासन कोणतेही निर्देश देऊ शकत नाही. तथापि वेतन खात्याशी संलग्न असणाऱ्या अपघात विमा विषयक विविध योजना अंतर्गत अधिकारी / कर्मचारी यांच्या वैयक्तिक फायद्याच्या आहेत. त्याकरीता बँकांकडून कोणतेही वेगळे शुल्क आकारले जात नाही. त्यामुळे काही राष्ट्रीयकृत बँकांकडून प्राप्त State Government Salary Package (SGSP) अंतर्गत अपघात विमा योजनांचा लाभ मिळण्यासंदर्भात अधिकारी / कर्मचारी यांना अवगत करणे योग्य वाटते. आवश्यक माहिती अभावी शासकीय अधिकारी / कर्मचारी यांच्या वेतन खात्याशी संलग्न असणाऱ्या अशा योजनांपासून वंचित राहू नये अशी यामागे भूमिका आहे.
सदर पत्रासोबत जोडलेल्या विवरणपत्रामध्ये वित्त विभागास राष्ट्रीयकृत बँकांकडून प्राप्त प्रस्ताव व त्याअंतर्गत “State Government Salary Package” (SGSP) या अपघात विमा योजनेचे विविध लाभ यांची माहिती दर्शविलेली आहे.
प्रशासकीय विभागांनी सदरची माहिती विभागाच्या अधिनस्त अधिकारी / कर्मचारी यांना अवगत करावी. तथापि अधिकारी / कर्मचाऱ्यांचे वेतन खाते कोणत्या बँकेत असावे याबाबतचा निर्णय कर्मचाऱ्याने वैयक्तिकरित्या घ्यावयाचा आहे.
अधिकारी / कर्मचारी यांना उपरोक्त योजनेबाबत काही शंका उद्भवल्यास त्यांनी संबंधित बँकांच्या स्थानिक शाखेकडे अथवा बँकेच्या मुख्यालयाकडे संपर्क साधावा. सदर प्रकरणी कोणतीही चौकशी अथवा पत्रव्यवहार वित्त विभागाकडे करु नये.
